പുഞ്ചിരി

 

പൊന്നിൽ തീർത്തൊരു സ്നേഹം

അതിൽ കല്ലായി പതിച്ചൊരു ഇഷ്ടം

മധുരം നിറച്ച് വർണ്ണങ്ങൾ പൊതിഞ്ഞ മനസ്സ്

കാത്തുനിന്ന് കയ്യിൽ ഏൽപിച്ച നേരം 

ചുണ്ടിൽ വിരിഞ്ഞ പുഞ്ചിരി മറക്കുമോ

മനസ്സിൽ തെളിഞ്ഞ മഴവിൽ

മഴ തോരുമൊരു നേരത്ത് 

പൊഴിയുന്ന തുള്ളികളിൽ

വിടരുന്ന മഴവിൽ തിളക്കം

പോൽ  മിന്നി തെളിഞ്ഞു 

മനസ്സിൻ്റെ  കണ്ണാടിയിൽ

നിൻ മിഴിയിൽ ഒഴുകുന്ന

കരിമണി മുത്തുകൾ 

മോഹം

ഉറങ്ങാനുള്ള കൊതിയാണോ

മറക്കാനുള്ള മടിയാണോ

ഓർക്കുവനുള്ള പേടിയാണോ

മനസ്സിന്റെ തീച്ചൂളയിൽ പൊള്ളുന്ന

ഓർമ്മകളുടെ തുരുത്തിൽ

തനിച്ച് ഇരിക്കാൻ മോഹം

വരികൾ

വരികളോടുള്ള പ്രണയം

വരച്ചുകാട്ടാൻ വരികളില്ല

വിധിയോടുള്ള നീരസം

വിട്ടുകളയാൻ മനസ്സുമില്ല

വാക്കുകൾക്ക് പറയാൻ

വിഷാദ സ്വപ്നങ്ങൾ മാത്രം

വിധി വരച്ച വഴിയേ 

വഴുതിപ്പോയൊരു ജീവിതം

വിങ്ങിടും മനസ്സിലെ ഇഷ്ടം

വീണ്ടും വരികളായി ഉണരും

എന്റെ സഖാവ്

വേലിക്കകത്ത്‌ മുളച്ചൊരു തൈമരം

കേരനിരകൾക്കിടയിൽ പടർന്ന പൂമരം

ഇന്നും വാടാതെ ഇൗ വിപ്ലവ വീഥിയിൽ

വസൂരി കവർന്നെടുത്ത പെറ്റമ്മയെ

ദൂരത്ത്‌ നോക്കി നിന്ന ബാല്യം

ബയണറ്റിൻ മുനയിൽ കുത്തിയേടുത്ത് 

കാട്ടിൽ എറിഞ്ഞുകളഞ്ഞ യൗവനം

വെട്ടിനിരത്തിയും ഇടിച്ചുനിരത്തിയും

കേരളമണ്ണിന് കാവലാളായി വാര്‍ദ്ധക്യം

മനസ്സിലെ വിഗ്രഹങ്ങൾ തച്ചുടച്ചു

മനുഷ്യനായി തീർന്നൊരു കമ്മ്യൂണിസ്റ്റ് 

നുണക്കുഴി

അകന്ന് പോയത് എന്തെ

മറഞ്ഞ് പോയത് എവിടെ

കനവിൽ കണ്ട കഥയിൽ

നിൻ നിഴൽ വീഴ്ത്തിയ ഓർമ്മകൾ

കനവായി  മായാതെ എൻ കരളിൽ 

മനസ്സിൽ കുറിച്ച വരികൾ തൻ ഈണം

മന്ത്രമായി മുഴങ്ങുമെൻ കാതിൽ

നിദ്രയെ കാത്ത് മിഴി അലയുമ്പോൾ

ഓർത്തു ഞാൻ നിൻ കവിളിൽ

പുഞ്ചിരി വിരിയിച്ച നുണക്കുഴികൾ

സഖാവ്

നെഞ്ചിൽ ഒരു കനലായി എരിയും

ഒരു ചെമ്പനിനീർ പുഷ്പം

വിരിയുമൊരു കാലം പൂക്കാലം

കണ്ണിൽ ഒരു കനവായി തെളിയും

ഒരു വസന്തകാല സ്വപ്നം

വളരുമൊരു കാലം വസന്തകാലം 

തെരുവിൽ ഒരു ഇതൾ പൊഴിയും

ഒരു വിപ്ലവ സമര വീര്യം

പിറക്കുമൊരു കാലം സുവർണ്ണകാലം

നിഴൽ

അകന്നു പോയത് എന്തെ

മറഞ്ഞു പോയത് എവിടെ

കനവിൽ കണ്ട കഥയിൽ

നിൻ നിഴൽ ഓർമ്മകൾ

കരളിൽ കുറിച്ച വരികൾ

മന്ത്രമായി മുഴങ്ങും കാതിൽ

നിദ്രയെ കാത്ത് മിഴികൾ

അലയുമാ ഇരുളിൽ തനിയെ

ഓർത്തുഞാൻ നീ വിതറിയ

കരളിലെ കുളിരോർമ്മകൾ 

ഒരു നിഴലായി എങ്കിലുമെൻ 

ജീവിത വഴിയിൽ തണലെകുമോ

മാറുന്ന കൂട്ടുകൾ

ഒന്നിച്ച് ഒന്നായി നടന്നിടും പലനാൾ
തനിച്ച് ആയിടാം നിനക്കാത്ത നേരത്ത്
വഴിയിൽ കൂട്ടുകൾ പലവഴിയായിടും
നേർവഴി തെറ്റാതെ നടന്നുകൊൾക
ലോകം കൂട്ടമായി ഒറ്റപ്പെടുത്തിയാലും
കാലം കൂട്ടായി എന്നും നിന്നുടും

തേടിയ നാളുകൾ

നീ നടന്ന വഴികളിൽ ഞാൻ 

അലഞ്ഞു വെറുതെയെങ്കിലും

കാത്തുനിന്ന ഇടങ്ങളിൽ നിൻ 

നിഴൽ പോലും മാഞ്ഞുപോയി

തിരഞ്ഞ തീരങ്ങളിൽ തിരകൾ

പോലും തിരിഞ്ഞുനോക്കിയില്ല 

ഹൃദയതാളുകളിൽ നീ എഴുതിയ

വരികൾ മന്ത്രിക്കുന്നു മനസ്സിൽ

എവിടെയോ മറഞ്ഞ പ്രണയത്തെ

തേടിയ നാളുകൾ ഓർമ്മകളായി

വിടവാങ്ങും നേരം

വന്നിടുമോ നീയെന്നെ ഒന്ന് കാണുവാൻ 

നോക്കിടുമോ ഇത്തിരിനേരമെൻ മുഖത്ത്

തന്നിടുമോ ഒരു ചുംബനമെൻ നെറ്റിയിൽ

തൊട്ടിടുമോ തണുത്തുറഞ്ഞയെൻ ഓർമ്മകളിൽ

അടഞ്ഞ മിഴികൾ തുറക്കുവാൻ 

കഴിയില്ല നിൻ മുഖമൊന്നു കാണുവാൻ

വരുമെന്ന പ്രതീക്ഷയിൽ ഞാനുറങ്ങുന്നു.

ഉറങ്ങട്ടെ നീ അറിയാതെ പോയയെൻ ഓർമ്മകളും

ഒളിച്ചിരിക്കുന്ന ഓർമ്മകൾ

കൺപീലികളിൽ കണ്ണീർ ചാലിച്ച് 

മനസ്സിൽ പകർത്തിയ ചിത്രങ്ങൾ 

അധരങ്ങളിൽ സ്നേഹം നിറച്ച് 

കാതിൽ മൂളിയ പാട്ടുകൾ 

വിരൽത്തുമ്പിൽ ചന്ദനം ചാലിച്ച് 

നെറ്റിയിൽ ചാർത്തിയ കളഭങ്ങൾ 

മായാതെ ഓർമ്മകൂട്ടിൽ ഒളിച്ചിരിക്കുന്നു.

💗💗💗💗💗

നൊമ്പരങ്ങൾ

മനസ്സിൽ നീറി തുളുമ്പിയ നൊമ്പരം
കൃഷ്ണമണികളിൽ നിന്ന് പൊടിഞ്ഞ്
നീർമണി മുത്തുകണങ്ങളായി
നിൻ കവിളുകളിൽ പടർന്നോഴുകി
മഴത്തുള്ളി ചേമ്പിലയിൽ ഒഴുകുംപോൽ
ഒഴുകി ഒഴുകി വീണു ചിതറിയെങ്കിലും
നൊമ്പരങ്ങൾ നൊമ്പരങ്ങളായി 

ഇന്നും മനസ്സിൽ...........💗

മാലാഖ

ജാലകം കടന്ന് മിഴി അലഞ്ഞു എങ്ങോ

ദൂരെ നീലാകാശത്ത് തിരഞ്ഞു എന്തോ

മിന്നും താരങ്ങൾക്ക് ഇടയിൽ എവിടെയോ

പൊഴിയും ഒരു താരമായി നീ വരുമോ

തൂവെള്ള ചിറകുകൾ വിടർത്തി

വിടർന്ന ചിരിയുമായി മനസ്സിൽ മുത്ത് വിതറാൻ

ആ പുഞ്ചിരി മതി മുറിവിൽ വസന്തം വിരിയാൻ

മോഹത്തിന്റെ യാത്ര

സ്പ്നങ്ങളുടെ തീരത്തേക്ക്

പ്രതീക്ഷയുടെ തോണിയുമായി

മോഹം തുഴഞ്ഞു തുടങ്ങി

തീരത്ത് എങ്ങോ മറന്ന കനവ് തേടി

തെന്നൽ തഴുകി ഉണർത്തിയ

ഓർമ്മയുടെ തീരത്തണയാൻ

മോഹം തുഴഞ്ഞു നീങ്ങി

തീരത്ത് എങ്ങോ മറന്ന കനവ് തേടി

കനവ് വെറും നിനവായിരുന്നുവെന്ന് 

അറിയാതെ തുഴഞ്ഞു മോഹം.

ഓർക്കാനൊരു കൊതി

കാറ്റിൽ പാറി പറന്ന കാർകൂന്തൽ

കവിളിൽ തലോടി കടന്നുപോയത്

കനവിൽ കണ്ടുറങ്ങാൻ കൊതിയാണ്....

മൗനമായി ഹൃദയത്തിൽ മന്ത്രിച്ച വാക്കുകൾ

മിഴികളിൽ വരികളായി തെളിഞ്ഞത്

മനസ്സിൽ കണ്ടുണരാൻ കൊതിയാണ്....

വെയിലേറ്റ് ചുവന്ന നിൻ കവിളുകളിൽ

വെള്ളമായി ഒഴുകുവാൻ മോഹിച്ചത്

വെറുതെ ഓർത്തിരിക്കാൻ കൊതിയാണ്.... 

ആദ്യരാത്രി

മാനം നിറയെ താരങ്ങൾ തെളിഞ്ഞു
മനം നിറയെ സ്വപ്നങ്ങൾ നിറഞ്ഞു
മുറ്റത്ത് നിലാവ് വെളിച്ചം വീശുന്നു
മന്ദാരം പൂക്കാൻ കാത്ത് നിൽക്കുന്നു
മരകൊമ്പിൽ കുയിൽ പാട്ട് മൂളുന്നു
മണിയറയിൽ മുല്ലപ്പൂ സുഗന്ധം പരന്നു
മധുവിധു തീരത്ത് കൈകോർത്ത്‌
മിഥുനങ്ങൾ നിശയുടെ താളത്തിൽ
                                         അലിഞ്ഞുചേർന്നു

ദീപം

വെളിച്ചം എങ്ങോ മറഞ്ഞു ഇരുട്ട് പരക്കുന്നു
നഗ്ന പാദം കിഴക്ക് ദിക്കിലേക്ക് നടക്കുന്നു
പദസ്വര മുഴക്കം കാതിൽ കേൾക്കുന്നു
ഇരുട്ടിൽ വെളിച്ചം മിഴിയിൽ തിളങ്ങുന്നു
പരുത്തിതുണി എണ്ണയിൽ എരിയുന്നു
എരിഞ്ഞ് തിരി തീയായി കാറ്റിൽ അലിയുന്നു
അധരങ്ങൾ മന്ത്രിച്ചുകൊണ്ടിരുന്നു
ദീപം... ദീപം... ദീപം..

മിന്നൽ മുരളി

പൊളിച്ചത് ഒരു പള്ളിരൂപമല്ല

പൊളിച്ചത് ഒരു സ്വപ്നമാണ്

പൊളിച്ചത് വലിയ കൂടംകൊണ്ടാണ്

പൊളിച്ചത് ഭീകര മനസ്സുകൊണ്ടാണ്

പൊളിക്കേണ്ടത് സ്വപ്നങ്ങളല്ല

പൊളിക്കേണ്ടത് പൊളിച്ചവരുടെ മനസ്സാണ്.

തീരത്ത് തനിയെ

തിരയുമ തിരകൾ ഇനിയും

തിരികെ വരുമോ

തിരിഞ്ഞുനോക്കി ഞാനാ

തിരയില്ലാ തീരത്ത്

തിരുത്തുമാ തെറ്റ് ഞാൻ

തിരിച്ചു വന്നിടുമെങ്കിൽ

നീ കാണാതെപോയ ഞാൻ

മൗനം കൊണ്ട് ഞാൻ എഴുതിയ വരികൾ

നീ വായിച്ചിരുന്നെങ്കിൽ

മിഴി കൊണ്ട് ഞാൻ വരച്ച ചിത്രങ്ങൾ

നീ നോക്കിയിരുനെങ്കിൽ

മോഹങ്ങൾ കൊണ്ട് ഞാൻ നെയ്ത സ്വപ്നങ്ങൾ

നീ കണ്ടിരുന്നെങ്കിൽ

ഇന്നുനിൻ്റെ  കരളിൻ്റെ താളിൽ
ഈ മുഖം തെളിഞ്ഞെനെ.

ഉറക്കഗുളിക

എന്നോ മറഞ്ഞ ഓർമ്മകൾ

മനസ്സിന്റെ തീരത്ത് ഓളം വെട്ടുമ്പോൾ

മിഴികളിൽ നനവ് കുളിരായി പടരും

നിദ്ര കാത്ത് മിഴികൾ അലയുമ്പോൾ

നിൻ മുഖം മനസ്സിൽ വരച്ചെടുക്കും

ആ പുഞ്ചിരി കണ്ണിൽ നിദ്രയായി പടരും

അമ്മമനസ്സ്

മൊഴിയാതെ നിൻ മനമറിയും
നീയറിയാതെ നിനക്കായി ജപിക്കും
മിഴി നനഞ്ഞാൽ ആരീരം പാടി ഉറക്കും
തെറ്റുകളിൽ പോലും ശരി തേടിടും
വേദനയിൽ തങ്ങായി നിന്നിടും
തളരുമ്പോൾ തണലായി കൂട്ടിരിക്കും
നടന്നകലുമ്പോൾ ഹൃദയം വിങ്ങിടും
അടുത്തണയുമ്പോൾ വാരിപ്പുണരും
സ്നേഹം മാത്രം നിറച്ച ഒരു മനസ്സ്

കാത്തിരിപ്പു ഞാൻ

നീറുന്ന മനസ്സുമായി തീരത്ത് ഞാൻ
നിലാവിൽ മാനം നോക്കി നിന്നു
ഓർമ്മകൾ തേടി മനസ്സ് അലഞ്ഞു
തിരയായി വന്നു കുളിര് പകർന്നു

നോക്കെത്താ ദൂരത്ത് നിന്ന് നീ ചിരിച്ചു
നോവറിയതങ്ങനെ ഞാൻ നോക്കിനിന്നു
മധുരം നീ പകർന്നു എൻ മനംനിറഞ്ഞു

ചാരത്തണയുമോ ഒന്നടുത്തുകാണാൻ
കാത്തിരിപ്പു ഞാൻ  തീരത്ത് എന്നും.

ജീവനോളം കരുതിയ നഷ്ടങ്ങൾ

മിഴിയിൽ കാർമേഘം ഇരുൾ തീർത്തു

തുളുബാൻ കാത്ത് കണ്ണീർ മുത്തുകൾ

മനസ്സിൽ എവിടെയോ ഇടിമുഴക്കം

വേദന മനസ്സിൽ വന്നു മുട്ടി വിളിച്ചു

ജീവനോളം കരുതിയ നഷ്ടങ്ങൾ

പേമാരിയായി പെയ്തു തോർന്നിരുനെങ്കിൽ

ഇന്ന് എന്റെ സങ്കടങ്ങൾ എല്ലാം.

**************************************

1997

ബെഞ്ചിലെ താളവും
ആരോ മൂളിയ ഈണവും
മറക്കുകയില്ല ജീവനുള്ള നാളുകൾ

മായാത്ത ഓർമ്മകളും
അണയാത്ത സ്വപ്നങ്ങളും
മറക്കുകയില്ല ജീവനുള്ള നാളുകൾ

അറിയാതെ പോയ നോട്ടവും
പറയാതെ പോയ ഇഷ്ടവും
മറക്കുകയില്ല ജീവനുള്ള നാളുകൾ

കൂടെകൂട്ടിയ കൂട്ടുകാരും
കൂടെനിന്ന ഗുരുക്കന്മാരും
മറക്കുകയില്ല ജീവനുള്ള നാളുകൾ

കൂട്ടുകൂടി നടന്ന നല്ല നാളുകൾ.

(കുറവുകൾ അറിഞ്ഞ് കൂടെകൂട്ടിയ എൻ്റെ  കൂട്ടുകാർക്ക് സമർപ്പിക്കുന്നു)

ഇന്നും ഓർക്കുന്നു.

തുളസിക്കതിർ ചൂടിയ നിൻ്റെ  മുടിയിൽ 

കണ്ണ് ചിമ്മാതെ നോക്കി നിന്നത്

ചിരിക്കുമ്പോൾ വിരിയുന്ന നുണക്കുഴി തൊടുന്നത് സ്വപനം കണ്ട് നിന്നത്

താളമിടുന്ന നിന്ൻ്റെ കൊലിസിൻ്റെ  സ്വരത്തിനായി 

കാത് കൂർപിച്ച് നിന്നത്

കൺമഷി വരഞ്ഞ മിഴിയുടെ ഒരു നോട്ടം 

കൊതിയോടെ നോക്കി നിന്നത്

നിഷ്കളങ്കമായ നിൻ പുഞ്ചിരി ഒരു നോക്കു കാണുവാൻ ഒളിഞ്ഞ് നിന്നത് 

ഇന്നും ഓർക്കുന്നു.

ആശയുടെ തീ നാളം

***************************************************

ഓർമ്മയുടെ ചില്ലയിൽ വിരുന്ന് വന്നു കിളി

ഓർമ്മകൾ ഉണർത്തി പറന്നകന്നു 

ഒരിക്കലും മായാത്ത കനവായി

നിദ്രയിൽ എന്നും നിറഞ്ഞുനിന്നു

ഇനിയും വരുമെന്ന പ്രതീക്ഷയുമായി 

മനസ്സിൽ നൊമ്പരമൊതുക്കി കാത്തിരുന്നു

കണ്ണടച്ചാൽ കനവിലും 
കണ്ണുതുറനാൽ  നിനവിലും

തെളിയും ഒരു ഓർമ്മ മാത്രം.

*****************************

ആശയുടെ തീ നാളമായി

എന്നും ഈ ഓർമ്മ ജ്വലിച്ചു നിൽകും.

കണ്ണുനീരിലെ കനവുകൾ.

എരിയും ഈ ഹൃദ്യം മഴുകുത്തിരി പോൽ

ഉരുകിയോഴുകും മിഴിനീർ തുള്ളികളായി

ജീവിതം ഉരുകി തീരുവാൻ കാലമായി

അരികിൽ നീ എത്തിടുമ്പോൾ

ഹൃദ്യം എരിഞ്ഞ് തിർന്നിടും

ഉരുകിയിറങ്ങിയ കണ്ണുനീർ ബാക്കി കാണും

തിരിച്ചറിയുമോ നീയാ
കണ്ണുനീരിലെ കനവുകൾ.

കുളിർമഴ

മഴയായി വീഴുന്ന ഓരോ തുള്ളിയും
മണ്ണിന് കുളിർമ്മ പകരും
തേനായി പൊഴിയുന്ന ഓരോ മൊഴിയും
മനസ്സിൽ പനിനീര്‍തുള്ളിപോല്‍ നിറയും
കനവിൽ കനലായി എരിയുന്ന മോഹങ്ങൾ
മനസ്സിൽ നിനക്കായുള്ള ദാഹം തീർത്തു
കണ്ണിൽ നിനക്കുവേണ്ടി മോഹം തളിർത്തു
പെയ്യുമോ നീ കുളിർമഴ പോലെ...

മനസ്സിലെ ഓർമ്മകൾ.

തിരകൾ പോലെയാണ് ഓർമ്മകൾ

നിനച്ചിരിക്കാത്ത നേരത്ത് മനസ്സിനെ തഴുകി കടന്നുപോകും

തൂവൽ പോലെയാണ് മനസ്സ്

തനിച്ചിരിക്കുന്ന നേരത്ത് ഓർമ്മകളെ തലോടി ഉണർത്തും.

ഒരു വട്ടം കൂടി

വിട പറഞ്ഞ വഴികളിൽ
പ്രിയ സുഹൃത്തുക്കൾ നൽകിയ
മധുരമുള്ള ഓർമ്മകളെ താലോലിക്കുമ്പോൾ
അറിയാതെ കൊതിച്ചുപോകുന്നു
ആ വഴികളിലൂടെ ഒന്നുകൂടെ നടക്കുവാൻ.

എവിടെ നീ ?

മഴത്തുള്ളികൾ കൈനീട്ടി പിടിക്കുമ്പോൾ

മഴവില്ലായി നീ വിരിയുന്നോയെന്ന് 

നോക്കിനിൽക്കും

പുഴയിലെ വെള്ളം കൈക്കുമ്പിളിൽ കോരുമ്പോൾ

ഓളങ്ങളിൽ നിൻ്റെ മുഖം തെളിയുന്നൊയെന്ന് 

നോക്കിനിൽക്കും

നീലാകാശത്ത് വർണങ്ങൾ വിരിയുമ്പോൾ

നക്ഷത്രമായി നീ മിന്നുന്നോയെന്നു 

നോക്കിനിൽക്കും

 മുല്ല വള്ളിയിൽ മൊട്ട് വിരിയുമ്പോൾ

പുമ്പാറ്റയായ്‌ നീ വരുന്നോയെന്ന് 

നോക്കിനിൽക്കും